hortulus

Valerian , Baldrian Valeriana officinalis,
Caprifoliaceae

Baldrian•
Valeriana latine, Arabice su, Grece ichynis.

Serapio in de buch aggregatoris in de capitel su id est valeriana spricht, das dises sey ein kraut un hat gar cleine lenglete pleter. Etlich meyster sprechen das dise pleter gleichen den epich pletern. Diß kraut hat ein weisse plümen. Sein wurtzel ist gleich eim zopffe mit har.

Plinius in dem capitel su spricht, das diß sey heiß an de. iii. grad un trucken am anfang deß. ii.

Paulus spricht das die wurtzel von disem kraut gepraucht werde in d ertzney.

Dise wurtzel machet schwitzen vo der getruncken, un macht auch harmen.

Strang uiriosis un diffuriis, das sind die mit not oder tröpfling netzent, un auch die den kalte saich haben den ist vast gut von diser wurtzel getruncken.

Dise wurtzel un das kraut haben gar ein starcken gerauch, die katzen reiben sich gern daran un werffen darwid iren samen darumb soll diß verwart werden vor den katzn das zu der ertzney gepraucht soll werde.

In de buch circa instans beschreibent unß die meyster und sprechen, das dise wurzel gederret wert. iij.iar unverseret an irer natur.

Dise wurtzel soll in dem augste gesamelt werden.

Baldrian und weiswurtz und einander gemüsscht mit rockenmeel tötet die meüß.

Baldrian mit fenchelsamen und eppensamen in wein gesoten ist seer machen harmen. Und ist auch gut wider den lenden weetagen, un pringt auch den frawen ir feüchtigkeit menstruum genannt.

Rosemary , Rosmarin Rosmarinus officinalis,
Lamiaceae

Roszmarin •
Anthos grece, et latine. Der myster johanes mesue spricht daz roßmarin sey heyß un trucken an de dritten grad• Serapio in de buche aggregatoris, spricht daz roßmarin hab bleter nahend als der fenckel, dan das sy breytter seind an den roßmarin und gröber, un haben gute gerauch un de lenge des stamens ist eines arms oder wenig mer• Und spricht auch das roßmarin auff de gipffel hab ein weyß semlin, die wurtzel ist weyß, und hat auch einen gerauch wie weyrach• Der meyster galienus spricht dz roßmarin habe in jm gar große tugendt•

Dyses kraut und hyrßzungen geleget über nacht in wein, unnd den getruncken, benymbt die geelsucht• Der safft vo roßmarin gemüscht mit honig ist auch fast gut genützet den tunckeln augen•

Der meyster Diascorides spricht, daz von roßmarin gemachet ein pflaster, und sunderliche von de bletern, ist fast gut dem der do hat feüchtblattern hynde in dem afftern wan es weychet und heylet seer•

Die wurtzel vo roßmarin gestossen, un auch gemüschet mit honig, und auff die schweer gelegt weychet sy zu hädt• Die wurtzel gelegt in wein mit kraut tag und nacht, genant paritatia gesotte und den getruncken, weychet den bauch, und benymbt jm das wee• Un ist auch also gut den gifftigen byssen an dem leybe wo die sein müge• Also genützet mit beyfuß vermengt machet wolhärme un vorderet die frawen an jrer kranckheyt•

Die blumen von roßmarin soll ma neme und sy bynden in ein weisses tüchlein, und syden in wein, und den trincken nüchter oder des abents das benymet vil sücht in de leybe, und mit name den frawen an de brüsten• Die blumen gepuluert und die in warme wein getruncken, macht frölich gemüt, und stercket die natur und das geblüt, un behütden mensche vor zufälliger kranckheyt• Von dem holtz gebrennet kolen•und•unnd von den stengeln, und die gepuluert, dz puluer in ein seyden tüchlein vermachet, und die zeen damitt geryben sy werden davon frisch un weyß un tödt die würm darjn•

Ite Wer das kalt wee hett, der nem d rynden von roßmarin, un mache dauen emen rauche, und lasse den geen in die naße, er genyßt•

Die wurtzel gesotten in eßsig und die füß damit gewäschen, behüt den mensche daselbst vor geschwulst un vor dem bodogram• Wer nüchter ysset die blumen mitt honigsam und mit ruckem brot, der ist sicher für die drüsen und geschwere un für zufallend kranckheyt•

Item Die bletter von roßmarin vertreybe den kreybß darauff gelegt•

Item Ein löffel gemachet von roßmarinholtz waz ma damit ysset dz schmecket gar wol unnd machet auch den menschen lustig und frölich• Item Wer nitt lustig wäre zu essen, der siede roßmaryn in wasser, und trincke des, unnd müsche semen wein damitt, er wirt gar lustig•

Wer geschwolle wäre an dem leib wo das wär od das gegicht hett, der siede die bletter in wasser, un leg syin ein dünnes leynes tüchlei, un bynde das darauff, er geneyßt zuhande•

Wer von hytz grossen durste leydet, der soll sein getranck müsche mit wasser do roßmarin jnn gesotten sey, und granatöpffel es hilffet on zweyel• Das puluer von den blumen also dürz gestossen, und auch in weychen eyeren geessen, stercket auch fast die natur des mensche und macht auch damit gar gutt geblüte•

Roßmarinkraut drey oder vier handtvol gethon in ein fäßlein do fünff od sechs vierteyle weins ein geet und darunder gemüschet hagenbuchen spen, und auch gute most des besten, und den darjnn lassen vergeren• Des weins getruncken des morgens ein gute trunck des geleichen des abents, der machet auch gar gutt schön geblüte in dem mensche, und bringet gar grossen lust zu essen• Und macht auch damit gar frölich, und vertreybt auch alle jnnerlichen gebresten, die do kümen vo besser feüchtigkeit• Und stercket auch fast seer den menschen sein krafft und benymmet auch gar vil onmächtigkeyt• Item in den appotecken, do machet ma auch ein electuarium, daz ist genannt dyanthos dises ist auch zu allen kranckheyte gar gut, und auch besser, und natürlicher genützet•

Item Roßmarinkraut mit wilden boley od steinmützen in wein unnd baumöl gesotten, damitt des menschen körper geschmieret, ist schweiß bügen, und ist auch gar gut der schweyßhalb wider wassersüchtüg•

Und roßmarin und rauten gesotten in wein mit wenig pfeffer gemenget, ist auch gut genützet wider die fallenden sucht genant epilentia•

Auch roßmarin i wein gesoten mit dyanchos vermengt ist auch gar gut wid onmächtigkeyt genant sincopis• Item roßmarin mit bertruin genant piretrum, in wein gesoten ist gut wid die großkeyt des zapffens, den mund damit gegorgelt•

Item roßmarin und mellisse in wasser gesotten, die muter damitt gereyniget machet sy leychtlich fruchtbar spricht Serapio•

Basket
Willow , Korbweide Salix viminalis,
Salicaceae

Ein weyde•
Salix vel salamentum latine grece ytee, arabice kuleff.

Der meyster Serapio in dem buche aggregatoris in de capitel ku eff, beschreybt uns und spricht das die bletter un die blumen von weyden seind fast trucken mache und die rynden von weyden sind mer truckner natur den die bletter und blumen, und darüb braucht man die rynden zu den fliessenden und feüchten geschweren an dem leybe an wölichen enden das seye. Aber die bleter und blumen brauchet man zu den ungeten die do trucken machen.

Item der meister paulus spricht, dz salix sey kalt und trucken an dem ersten grade.

Die rynden gebrennet und gepuluert und das mit eßsig gemenget hilffet zu allen wunden die do sind zu trucken, darüber gestryche un mit einem tüchlin darauff gelegt.

Item die bleter gestossen un darunder gemengt pfefferkörner hilffet fast wol dem därmegesücht, dyses emgenomen mit semmem gebrennten wasser.

Dyses puluer der weyden getruncke mit eßsig stopffet die bluttende nasen >oder wunden des geleychen auch darumb gestrichen.

Item wölicher groß hytz hett der nem weyden bletter un streüe die umb sich sy külen fast in der heyssen zeyt des sumers.

Galienus in de sibenden buche genant simplicium farmacarum in dem capitel jtee idest salix beschreybt uns unnd spricht das die blumen fast nütz sind in d ertzney und darauß gemachet ein pflaster gemengt mit rosenöl, un brauchen auch das zu mangen sachen die do hytzig und feücht sind wan sy kulen unnd trücknen fast wol.

Auch ist die äsche gar gut zu feüchten schäden. Unnd dyses braucht der meyster Wilhelmus in seiner cirozgi gar vil sachen.

Item weyden safft mit wegbreyte wasser vermenget ist gutt wider den blutgang.

Elder ,
Holunder Sambucus nigra,
Adoxaceae

Holler•
Sambucus vel cameactus latine Grece sell, Arabice afol vel also velbulipensimü.

In de buch circa instans in de capitel sambucus, beschreibe unß die meister un sprechen, das holler sey vo natur heiß an dem.ij. grad un trucken am ersten. Die rind deß hollers praucht man mer in d ertzney dan die plümen rc.

Serapio spricht, das die pleter noch also grün gestossen und auff die grindig haut gelegt heilet seer.

Also gelegt auff das geschwer das sich erhebt an den fingern und heist gemaingklich d würm ist es vast gut und heilet den zu hande.

Die pleter gesoten in wein und den getruncken benymbt alle überflüssigkeit d feüchtung. Und sind vast gut genützt den wassersüchtigen.

Item die rinden gesotten in wasser so sy noch grün sind un das getruncken machet vast oben aus prechen.

Der gerauch von holer ist fast starck un krenckt das haubt und macht gern plüten die nasen.

Die pleter von holler od die früchte gesotten in gesaltznem wasser benimbt die geschwulst vo den füessen die damit gewesschen.

Hollerpleter gesote in wein od in öl und das gelegt auff das verherrt miltz waichet das zuhande.

Die rinden sind gar gut genüzet flegmaticis, das sind die die vil kalter feüchtung haben. Und sunderlich ist holler gut alten leuten.

Hollerpleter mit essig und saltz gesoten und auff die bösen gestalt deß grindes gelegt ist dartzu gut. Und wenn man dartzu müsschet pleiweiß so ist es besser.

Hollerplü gerochen von eim hitzigen menschen pringt das haubtwee un stetigs gerochen macht die nasen pluten.

StJohn’s wort, Johanniskraut Hypericum perforatum, Hypericaceae

Johannesblumen•
Flores sancti Johannis latine.

Die meyster sprechen, das dyse blumen sind von natur getemperieret, und werdent zu einer kranckheyt genützet genennet amor heremos, das ist ein sorgfelige begierde des mannes zu einer frawen oder einer frawen zu einem man. Ettlich meyster die spreche, das dyses sey teüffels liebe und nit menliche. Darumb wöllicher eyn söllicher melancolicus wär, also daz er weder tag noch nacht ruwe hette in seinem haubt unnd alle zeyt gern bey frauwen sein wölt, der selbig neme zu jm dyse blumen, sein fantasey unnd böser willen der wirt gewandelt zu guttem. Unnd du solt auch darmit gedencken die keüscheyt sant Johannsen, unnd jm opfferen einen pater noster unnd ein Avemaria. Du wirst erlößt von dyser bösen melancoley on allen zweyfel Paulus.

Marygold, Ringelblume Calendula officinalis,
Asteraceae

Ringel blumen •
Caput monachi fiue caparuslaune grece kynolbaton•
arabice hapar. In dem buch genant circa instans in de capitel Caparus stet geschriben das dises fey heiß un trocken an de andern grade• Die rinde wurczel bleter und blume dienen alle in der ärczneye. Dye rinden sol man sameln an de angreenden des meyes unnd sol die auff hencken und die lassen dorren• die rinden sind fünff jar gut Die blüme sollen gesamelt werden so sye noch in den knöpffen sind• Wenn man sy sich auf breiten so sind sy nichts wert• Dise blumen sol man beyssen mit salcz umid sy hin legen die sind auch zwey jare gut•

Sy stercken de magen und machen lust zu essen Die böse feüchtigkeyt in dem magen verzeren dise blumen• Den erkalten magen machen sy warme•

Die rinde hatt gar groß tugendt an ir• wan sÿ duchtringet und verzeret böse feüchtigkeit• Die rinde gesoten in wein und den getruncken ist güte den lebersüchtigen•

Das buluer von den rinde gemischet mit fenchelsamen safft un den geton under wein und ein wenig öle und daz gesoten biß es dick wirt umid darnach thu darzu wenig wachs un mache darauß ein salbe• Dise salb ist gut genüczet außwendig an das milcz gestrichen des geleiche auff den erkalte magen•

Den safft von den bletern in dye oren gelassen tödtet auch die würm darinne•

Der wirdig meister Auicenna spricht dz die rinden gebuluert un auff die bösen faulen blatern gelegt heylet sye• Ein kristier gemachet von dem saffte des krauts umid der wurczeln ist fast gut genüczt den lamen gelydern•

Violet ,
Veilchen Viola, Violaceae

Veyel •
Viola latine. Grece leucis. Arabice feneflig vel fenefig.

Item in de buch circa instans beschreiben unß die meyster un sprechent das veyel sind kalt in dem ersten grade und feücht am end deß andern grades• Veieln söllen gesamelt werden im mertzen und die trücknen an der sunnen.

Diser syropel von feieln sol daß gesoten werden darm syropel von ndern plümen.

Dyascorides in dem capitel leucis id est viola beschreibet unß und spricht, das der veyel unß sey wol erkannt Un dise plumen werden in der ertzney genützt, un werent nur ein iar.

Dise plumen benement die geschwulst von de magen. Un das wasser von disen plumen ist gar gut für das geschwer in dem halß genannt squinantia, das gar garisiret.

Der safft von veyelkraut benymbt alle erhabne geschwulst, die do kumbt von hitz.

Deß samens getruncken, y. quintin mit wein pringt den frawen ir kranckheit.

Dise wurtzel gesoten mit wein un die gelegt auff das erhaben miltz benymbt die geschwulst darvon und machet das trucken.

Auch ist diß sunderlich gut genützt poda gricis, dar über gelegte als ein pflaster.

Platearius, der weissen veyel gesoten un die gelegte auff den bauch der frawen treibet aus das tod kind, un benymbt der matricen ir geschwulst, un damit gepeet von unden auffreiniget die matricen un pringt menstruum.

Johannes Mesue spricht, das die veyel das haubtwee das do kumbt von hitze und machen ruen und schlaffen un senfftigent die prust un benemen vuulä das ist das plat in d kelen un anch squinantia, und diß thüt sunderlich der siropel von veyel.

Die meyster sprechen gemeingklich das do sey dreierhant veyel, einer ist weiß, der ander schwartz, der drit pfellerfarb, und habent all ein krafft in d ertzney.

Veyel sind gut gestossen und auff das erhitziget gelid gelegt an dem leib.

Veyel gerochen oder das kraut auff dem haubt getrage vertreibt die trunckenheit.

Veyel in wasser gesotten und das getruncken benymbt das schwerent zanfleisch.

Veyelkraut gesoten un den bauch niderhalbe den nabel da mit gepeet hilfft der zerschwollen muter.

Veyelwurtzel gestossen mit essig und das getruncken hilffet dem zerschwollen miltz darauff gelegt.

Diß hiffet auch der suchte podo gra darauff gelegt.

Platearius, Veyelkraut un die wurtzel gestossen mit wasser un das getruncken hilffet vastwol die sind an dem hüften un ob sy schwer etmen.

Veyelöl ist zumenigen sachen gut un sunderlich das in die oren gestossen hilfft für allerhand wee darinn, und benymmet das haubtwee das daran gestrichen.

Mit de öle den bauch bestrichen vertreibt die spulwürme darein vermengt wurmkraut.

Item ein siropel gemacht von veyelplumen also. Nym veyelplumen drey hant vol und gesoten in wasser und durch geschlagen und auch süeß gemachet mit zucker ist vast gut wid die hitz deß viebers, und pringt auch stülgeng, und ist vast gut wider die hitzigen lebern Hec Platearius.

Mugwort, Beyfuss Artemisia vulgaris,
Asteraceae

Beyfuß•
Arthemisia mater herbarum ari uoso, ampolata Putonica Campanaria• Metricaria minor latine• Melenoff Zantes Thagetes Leptafeloß• Die würdigen meyster Auicenna Diascorides, beschreyben uns von dysem kraut, und spreche das arthemisia sey ein kraut un geleychet dem wörmüt, unnd der stabwurtz an der gestalt, allein dz beyfüß breytter bletter hat• Die bleter sind außwendig weiß un inwendig grün, und haben einen starcken gerauch un bytter• Dyses kraut hat lang stengel• Die blümen daran geleychen den camillen blüme Unnd heysses darüb arthemisia wan der künig masolei genannt heet ein hauß frawen die hyeß Arthemisia die wolt das dyses kraute auch also genennt würd, umb tugent willen die dyse künigin an dysem kraut befandt•

Der meyster Plinius spricht, dz dyses kraute vorhyn geheyssen hatt parthenis• Ysodorus m de• xvy• büch genant ethymologiarü spricht, dz arthemisia sey ein kraut, unnd sey von de heydnische volck dyane cosecriert worden und den also geheyssen, wan dyana in grecum ist als vil gesproche als arthemis•

Platearius spricht, das dyses kraut is heyß und trucken in dem dritte grad• Die bletter brauchet man in der ertzney, und selten wie wurtzel, und sind grün besser genützet san dürz•

Platearius spricht, das beyfuß gut sey den frawen zu irer sucht genant menstruum• Und wöliche fraw das zu rechter zeyt nicht hat, die soll de beyfuß sieden mit wein, und soll den trincke• S hilfft on zweyfel• Es hilfft auch ob sy sich damitt in de bad zu de dickern mal bäet unden auf beydent halben den nabel•

Der meyster Dyascorides spricht, wöliche fraw weemitt eine kinde geet oder in arbeyt liget eines kindes, seüdet sy de beyfuß mitt wein oder mit bier, und den also trincket, sy genyßt zuhandt• Oder bindet man ir das gesotten kraut an ir rechtes diech, sy genßt zuhande• Man soll auch zuhandt wen das kind geborn wird dz kraut abneme saumet man sic des•dzb recht grossen schaden• Wölliche fraw ein todtes kind in jrem leyb hett, die trincke von beyfuß• Sy wird des kindes sanfft ledig•

Item diascorides in de capitel Arthemisia spricht auch, wer de beyfuß nützet das im vergifft un zauberey mit geschaden müg, im schadet auch nicht ob ein thier dz nichtt synnig sey wär in beysset•

Ite wer beyfuß in seine hauß hat, de mag der teüfel keinen schaden zufüge• Item wer der beyfußwurtz an seine halß tregt, kein vergifftig thier mah im int geschade• Un ob ein vergifftig thiere einen schade zu gefügt hett der trincke des safftes von beyfuß, er genyßt zu handt•

Die würdigen myster sprechen gemeynigklich das do sey zweyerhand beyfuß• D ein ist rot an de styl• der ander ist weyß•

Wöliche fraw die sucht genannt menstruu leydet über die zeyt, die soll d rotten beyfuß bletter siede in wein un den trincken• Weret aber die sucht menstruu zu lang, so soll sy des weyssen beyfuß bletter siede in wein, un also nütze es vergeet ir zu handt• Ite beyfuß genützt mit wein, macht wolhärme•

Diascorides, Beyfuß d ist fast gutt für den stein wen ma in puluert, un dz puluer nützt mit eppich wasser, und daz also getruncken• Beyfuß mit wein gesote un den getruncke vertreyt alle die sucht die da werende ist an d statder weyber die do sind gebere, es sey geschwulst oder anders•

Wer den beyfuß bey im tregt, wenn er wanderet der wirt nitt müde•

Item wer der beyfuß wurtzle über die thore des hauß legt oder henckt, de hauß mag nichtz übels od ungeheürigkeyt zugeben werde•

Der hochgelert meyster galienus spricht, dz beyde beyfuß rot und weyß gut sey den frawen genützet wen es in not sey• Un auch fast wolbekome den, die den stein haben in den lenden•

Der meyster Plinius in seinem xv• buch in de capitel Arthemisia spricht, das arthemisia die ettwan geheyssen ist parthemis, sey zweyerhandt eyne hat breyte bleter, die ander dünner un kleiner un habe beyde ein natur und tugendt• Item dyser meyster in seine xxvi•buch spricht auch, wer beyfuß bey im hab, so er über feld geet, der wird nit müd, un im schadet auch der gang nicht in de gelydern• Er spricht auch in de selben capitel, dz arthemisia gestossen unnd gemüschet mit feygen, un mirra yegkliches ein quintin, und daz gelegt in wein, und den getruncken, erwörmet den kalten magen• Er spricht auch, daz dyses krautes wurtzel eingenomen, so festigklichen laxieren ist, und purgieren, das das kind in müter leyb nit beleybe müge, es sey tod od lebendig•

Der meyster Platearius spricht, dz dyses krautes bleter bequemer seyen in der ertzney den die wurtzel, un grün mer nutz den dürr• Und sey sunderlich gut genützet der unfruchtberen frawe• Item beyfuß und dillsamen gebuluert und vermengt ist gut wid die feüchtblattern darauff gelegt, oder auff beülen hynder den oren, daruor sol ma das mit einer schrepff fleten blüte machen, und darauff das puluer legen•

Item beyfuß ist ser bestopffung d gelider auffthun als miltz und lebern die do von einer kalten materien kummet, also genützet• Nym beyfuß und hyrßzungen yegkliches ein handt vol und ein wenig wormüte in wein gesotten, und mit zucken suß gemachet• Dyser tranck ist auch gut wider die geelsucht so man darzu ist vermengen ein wenig tausent guldin genannt centaure• Unnd was nach dem getrancke über beleybt von kreüttern soll man do warm legen auff die miltze• Das selb ist auch gutt so die miltz außwendig geschwolle ist• Item beyfuß und wolle genannt taxus barbatus gesotten mit wein, un also warme darauff gesessen, ist gut dem der arßdarm außgeet•

Caraway , Kuemmel Carum carvi, Apiaceae

Kümel •
Ciminium latine et grece. Arabice camin.

In de buche genant pandecta in de capitel Camyn beschreibent uns die meistr vo magerhad kümmel. Aber hye wirt uns allein geschribe von de selben kümel de wir in teütsche landen gemeynigklichen nützen, un der ist heyß un trucken an de dritten grad.

In de buche circa instas in dem capitel Cyminu steet geschriben daz dises sey ein kraut un daran wechßt vil sames un den mag man nit felschen umb der menig willen des sames.

Diser sam weret fünff jare unversert an seiner natur.

Diascorides spricht, das kümmel in d kost geessen, un dacon getruncke stercket die deüung in dem mage. Der sam gesotten in wein, un darund gemüscht siben gezeyte genent fenum grecum benympt den schmertzen der därm und riinget vinde.

Item kümmel gestoßen, un do gemüscht mit de weyssin eines eyes und das gelegt auff die rotten augen benymbt die rötte darvon.

Kümel gesoten mit wein und derüder gemüschet feygen die trucken sind, und den getruncken benymmet den alten bösen hüften.

Kümmel in dem mund gehalten und den gekeüwet, unnd den attem geblasen wider die augen, unnd daz machet sy kalt und lautter.

Wem daz blüte an dem leib gelebert wäre von schlegen oder fallen oder wie das wär der nem das puluer von kümel, unnd müsche daz mit wachß bey dem feüer und lege das darauff, das zerteylet das gelebert blut, unnd ist gewyß.

Wölicher kümel vil nützet der gewinnet ein böse farbe.

Wölicher den schnopffen hett der sich erheben hat von kelte, der neme kümel gepuluert und lorber yegliches geleych vil, un thu das in ein säcklein un leg daz auff dein haubt es hillft on zweyfel.

Ite Nymm kümmel und seüde den in wein und lege den also warmen auff de nabel, es benymbt sträguiriam unnd dissuriam, das ist den kalten siechtage und ander vil gebresteder blasen.

Item Auicenna in seinem andern buch in dem capitel cyminu spricht, das kümel bringe winde genenet ventositates, und beneme od verzere die bösen feüchtung in dem menschen.

Item kümmel mit wasser gesotten, un dz antlütz damit gewäschen wirt lauter und klar davon Aber dyses soll selten geschehe un nitt zu vil.

Kümmel gestossen und gemüschet mitt eßsig, un für die naßen gehalte, und gerochen, benymbt das blutte auß d nasen.

Kümmel gemüschet mit eßsig und wasser, und das getruncke benymbt das keychen.

Kümel genützet benybt dz blut seyche un benymbt den zerschwolle bauch.

Hyssop , Ysop Hyssopus officinalis,
Lamiaceae

Ysop•
Isopus latine et grece.

Die meyster sprechen daz dises kraut daz sey heyß und trucken an dem andern grade.

Diascorides spricht daz ysopus sey ein kraute, und hat bleter bey nahe als boley, und einen langen stengel darauff blumen geleych dem quendel

In dem buch genant circa instans beschreyben uns die meister und sprechen auch, das dyses karut genützet sol werden in der ertzney unnd nicht die wurtzel.

In dem summer so dises kraut blume hatt so soll man es ab schneyden und lassen dorren an dem schadte und nit an der sunnen, und wenn man das nützet wil in den ertzneyen so soll ma die bleter abstreyffen von dem stengel, und sol den stengel hynwerffen. Die bleter werendt ein jar unuerseret an jrer tugendt.

Diascorides spricht, daz dyses kraute gesotten mit feügen und hönig unnd das do genützet verteybt den husten. Also genützt hilfft es dem lungensüchtigen.

Isop gesoten und getruncken vertreybt die spülwürm, zu dysen dinge ist sy gut mit honig gemüschet.

Platearius Isopen safft getruncken mitt oximel, weychet den verstopfften bauch.

Isop safft mitt kressen samen genützet, laxieret senffligklichen.

Plinius wöllicher ein schönes antlütze will haben, der trinck von ysop sy sey grün oder dürz, der gewynnet ein schön lauter antlütz.

Isop gesotten mit lauterm schmaltz un mitt trucken feygen, unnd als ein pflaster auff die geschwulste des miltzes geleget, vertreybet die zuhande.

Item mit wein getruncken raumet die brust.

Isop in wasser gesoten unnd das schwerend zanfleysch damitt gewäsche benymbt das zuhandt.

Paulus spricht, ysop gesoten mit wein und darunder gemüschet fenchelsamen un den getruncken benymmet das wee dem magen und in den därmen.

Wöilicher frawe ir muter unreyn wär, die soll sich bäen unden auff mit ysop, reyniget sy on schaden.

Ysop unnd fennchelsamen in wein gesoten, ist gut wider weetage des magens Platearius.

Wormwood, Wermut Artemisia absinthium,
Asteraceae

Wörmut•
Absinthiu latine, grece Absinthion, arabice Saricon• Die meyster in der ertzney sprechen, daz wörmut sey heyß in dem ersten grade, und trucken in dem andern• Platearius spricht, das wörmute ein widerwertige naturen an ir hab wan sy laxiert und stopffet unnd die zwey sind wider ein ander• Unnd darumb spricht er, das wörmut genützt sol werden mitt wermüschung und dz angesehen werde gebreste des menschen, wan ist es sach des die nature des menschen verstopffet wäre, so soll man der wörmut zu geben ding die ir natur beneme d stropffung, und allein laxiere•

Ist es aber sache das die natur zu vil flüssig wäre, so soll man dem wörmut nemen die natur des flusses, vmid zu geben ding die do stopffen•

Hierinn mercke eben wilt du den mensche stopffen mit wörmut so brauch dye mit eßsig oder mit wein• Wilt du aber den menschen laxieren mitt wörmut, so brauch die mit hönig oder zucker•

Auicenna sprichcht, das der safft von wörmut fast stercker eyzu nützen denn das kraut, wann der saffte der ist do heysser in dem ersten grade denn das kraut•

Wer wörmut saft trincket zehen tag nach einander, un auf ein male vier quintin mit zucker vermenget, der selbig saffte verzeret yctericiam, das ist die geschwulst und benymbt auch dem mensche also genützt ydropisum, das ist die wassersucht• Und also genützet zeühet vil feüchtigkeyt vo dem milz und leberen• Johannes msue spricht, das wörmut stercket den magen, unnd die leber, unnd bringet lust zu essen, unnd machet gesund die verstopffeten kranckheit, als dann ist die gelsucht und die wassersucht•

Wörmut tödtet die würm in dem bauch, unnd treybt sy auß mächtigklich, wan man davon macht ein pflaster also• Nymm wörmut vier lott wüforbie ein halb lot gebrennet, hyrßkoren ein lot, und ein lot hasengallen und darunder gemüschet honig und darauß ein pflaster gemacht unnd das gelegt auff den bauch• Item wer das kalt lange zeyt gehabt hatt, der nütze zu frümen den safft von wörmut mit zucker vermegt, er genyßt davo zuhand•

Wörmut safft vermengt mit pferßsichkeren, und in die oren geträfft, machet sterben die würm in den oren•

Wörmut reyniget den magen un leber von der gallen genannt colera, und zeühet zu zeite die selben feüchtung auß mit dem härmen• Auch behut wörmut de menschen vor füllung des geblutes in dem leybe, mitt wein gesoten, unnd des tages auff ein mal nüchter getruncken auff vier lot•

Wörmut wasser gemüschet under tinten, behüt das papier vor den meüsen und würmen damit geschube•

Wörmut ist fast gut und nütze den zerknüschte gelydern, wen man darzu thut oder vermüschet honig, un ein wenig guts weins und gestossen kümel unnd also darauff gelegt geleych einem pflaster•

Öle vo wörmut gemacht und in die oren gellassen bringet widerumb das gehörde• Ite wörmut mit eßsig gemenget und den mund mit gewäsche macht eine wolriechende munde•

Die meyster spreche, dz wörmut sterckt fast den mage, also vertreybet sy alles dz in de magen böß ist•

Wörmut und eppichkraut eynes als vil als des andern, gestossen und den safft getruncken mit zucker und mit süssem holz safft vermengt, vertreybt asma, dz ist das schwär attmen•

Wörmut gestossen un das safft gemengt mit honig, und an die augen gestrichen, machet sy klar• Wörmut gesoten mit baumöl, und damitt de bauch bestricht das hifft de krancken magen und der bösen lebern• Ite wörmut saffte mit honig vermenget ist gut wider die trunckenheyt•

Unnd wörmut safft ist auch wütt der frawe feüchtigkeyt zu bewege die zu man zeit bestopffet ist, vermengt mit beyfußsaffte unnd auch mitt ein wenig mirra un auch honig, darauß gemache ein zapffen in ir schame gelegt als Auicenna und Serapio un Pandecta sind bewäre•

Item wörmut safft und porris safft genant borago, unnd tausent guldin blumen, genannt centaurea, gesotten mit geyschen milchmolcken, mitt zucker süß gemacht, ist güt wider des miltzes siechtung, und wider das fieber•

Item wörmut gesotten in laugen mit stabwurtze, damit das haubt gewäschen, ist wüt wider die haraußfallung, genennt alopicia•

Lavender , Lavendel Lavandula angustifolia,
Lamiaceae

Lafendel•

Die meyster beschreibe unß, un sprechen, das lafendelkraut heysser un truckner natur sey, die plumen haben wenig safftz in yn, und sind den menschen nit gut zu essen, und haben doch ein scharffen gerauch.

Platearius, Lafendel dick an die nasen gehalten und daran gerochen sterckt das gesicht, un sein gerauch leüttert dem menschen seine auge.

Plinius. Welicher vil leüß hab der schmeck stetigklich lafendel sy sterben daruon.

Item welicher übe land wandelte und sicher sein wöll vor leüsen der sied lafendel in wasser un netz darmit sein haubt und laß es widerumb trucken werde, un thu es als lang biß das haubt den gerauch habe vo dem lafendelwasser so kumbt kein lauß darauff.

Etlich meyster sprechen das ein solich haubt das also genetzt wirt in gesotnem lafendelwasser, macht den mesche gar keüsche. Und darumb het die muter gotes mer lieb zu dem kraute der ursach halb das es feüchtigkeit pringt. Un darumb sind dise plumen mer begabet mit süessem un gutem gerauche so sy schon dürr sind dan ander plumen als negelein oder feyel. Auch hat sy die muter gottes lieber gehabte darumb das sy die cleider hehütent vor unfeltigen thyeren. Und yn ist auch darumb der namen gegeben worden lave das ist als vil gesprochen als rainigkeit oder wasch. Un also haben es die alten geheyssen, un darnach ist disem wort lave zugegeben worden ein zusatz als dula, und allso geheissen lavendula umb deß süessen gerauchs willen. Und darum laut es auch dester süesser.

Die wirdigen meister sprechen das dise plumen haben sunderlich groß tugent in yn, und sunderlich ad appoplexia das ist zu de schlag.

Die plummen gebeyst in wein un den distilirte un in dem mund gehalten so sich d preste eügent behelt den meschen bey feiner sprach. Un auch ander vil tungent, die hienach gelassen werden.

Peppermint , Pfefferminze Mentha × piperita,
Lamiaceae

Müntz•
Menta latine grece diosmoi, arabice Nachama vel Dichanacha.

In de buch genant Pandecta in dem capitel menta beschreyben uns die meyster und sprechen daz manger hand müntz sey die ein ist zäme und wechßt in den gärten, dyse hat einen guten gerauch, un die ist hytziger unnd stercker von natur.

Ein ander müntz und die ist wyld, unnd die ist zu latein genannt menstruu von der wir hernach in sunderheyt ettwas schreyben. Es ist auch ein andere müntz die hat lange spytzige bletter und heyßt zu latein menta romana, es ist auch ein ander menta, die heyßt zu latei menta aquatica, auch heissen ettlich meyster mentam aquaticam simbriu oder balsamita, es ist auch ein ander menta die hatt keinen gerauch, unnd ist zu latein genannt calamentu.

Der meyster Serapio in de capitel dichamachaides menta beschreybt uns unnd spricht, das die zäm müntz sey grüne summer und wynter. Auch ist zu wissen daz diser figur dreü kreüter steen, und alle menta genannt sind, un haben beynahe ein natur und darumb werde sy gebraucht eines geleich dem andern.

Der meyster Paulus spricht, dz menta und sunderlich die zäm sey heyß und trucken an dem dritten grad ettlich spreche an dem andern grade Und dises kraut braucht man in der ertzney mer den die andern, und ist auch gut grün und dürre.

Der meyster Auicenna beschreybt uns und spricht das menta sey heyß un trucke an dem andern grad, des geleyche beschreibe uns die meyster in dem buch genannt circa instans, und das ist gar ein kleine underscheyde mit dem meyster Paulo der do spricht an dem dritte grade.

Item die meyster sprechen gemeynigklich, das müntze und sunderlich die zäm, stercke den magen und mach wol deüen

Item Menta genützet ist fast gut für die spilwüm, des puluers eingenomen mit milch.

Menta gesoten und damit gebäet das geschwollen gemächte, benymbt die geschwulst behendigklichen.

Menta gestossen und auff die hertten brüst geleget do die milch jmien verherttet ist, un auch das do geschwollen ist, weychet und benymbt die seer darjnn.

Menta geessen weichet de bauch Menta alle tag genützet der hat schöne farb und ist gesund zu aller zeyt.

Diascorides spricht dz der safft auch gar gut sey getruncken mitt eßsig den jenen die do blut speyen.

Item die styrn gestrychen mit de safft benymbt auch haubtwee

Item den safft getruncke mitt hönig wasser genannt mulsa benymbt das sausen in den oren.

Item müntzen gesotten mitt wein und den getruncke benymbt den übelriechenden munde. Auch mag man darunder müsche eßsig un do den mund mit wäsche, macht gut zeen. Also genützet vertreibet die sere an der zunge die do kömmet von hytze.

Item Menta und rautten unnd auch zwybeln yegkliches geleych vil, unnd auch darzu gemüschet saltz, und die zü samen gestossen und darauff gelegt wo die natur stycht od beyßt es hilfft on zweyfel.

Item menta mit hönig gestossen und auch gemüschet mit eßsig und gebunden auff einen byß eines tobende hundes, es hilfft.

Die frawen die sich saume an irer sucht, die sollendt essen müntzen und daruon trincken, es bringt jr feüchtigkeyt

Item wer des morgens nüchtern sein zeen wechßt mitt müntze dem vergeet der zenschweer.

Item müntzensafft mit hönig getemperieret unnd an de augen gestrichen vertreybet die tunckelheyt.

Menta geteperieret mit eßsig, benymmet auch die flecken in den augen neben darüb gestrychen.

Item wöllicher do hett emorroidas, das ist ein fuße des afftern, d streyche des safftes darauff, er heylet die gebresten zu hande.

Der meyster Auicenna in seinem andern buch in dem capitel menta beschreybet uns und spricht, das menta sterck den mage und mach auch jn gar warm, un benymmet auch das auffstossen und das brechen. Und benymmet auch yctericia das ist die geelsucht.

Item für dyses yetzund genennet stuck in dysem capitel ist auch der syropel von müntzen an dem beste genützet.

Platearius der syropel bringet auch gelust de mänen und auch den frawen.

Ribwort
plantain , Spitzwegerich Plantago lanceolata,
Plantaginaceae

Klein wegrich •
Plantago minor latie.

Die meister spreche, das spitziger wegrich helff zu alle den dingen dartzu der groß hilfft, allein das ir krautt nit als groß ist.

Ir saffe ist gut zu den geschweren die bey der nasen wachssent, dar auff gelegte mit waicher wolle als ein pflaster, un diß pflaster sol ye über.ix.tag verneüert werden.

Wen ein spinn sticht od ein and gifftiger wurm, der salb den stich mit dem safft dises krautz.

Item wen gedeücht in seinem leibe das er geessen oder getruncken hette zauberey der soll trincken vo wegrichsafft un darnach nemen ein purgatz so wirt er entlediget.

Wem das stechen wee thet der leg diß krautz pletter in wasser, un leg sy also warm an die stat daran es yn sticht od auff das miltz so wird ym bas.

Wer ein böse druß hett an seine leibe der nem diser wurtzel un prate die bey dem feür un pinde sy darauff also warmb, es hilfft.

Wer das gegicht het, d nem grossen wegrich, yetlichs gleych vil, und tring daraus den safft, un temperir den mit wein oder mit honig, und trinck dann das das gegicht schwindet.

Wer genaigt ist zu de krampff d stoß wegrich mit starcke weyn, un leg den darauff, es hilffet wol.

Wer deß safftz trincket von spizigem wegrich dem treibet es aus manigerhand sucht in der plasen.

Von de spitzige wegrich nym.iij.pleter un halt die in dem mund so letziget dich kein pyn.

Wer den vierteglichen ritten get, quartana genannt, d trinck von disem safft zwu stund vor hin ee das kume, Oder seüde das kraut auch in wein und trincke den deß morgentz nüchtern zu dreimalen, ye über den andern tag ein mal es hilfft gwiß.

Wegrichsafft getruncken, vertreibet secundina, das ist die haut do das kind inn gelegen ist in muter leibe.

Wegrichsafft auff die geschwulst gelegt als ein pflaster benimbt sy

Wegrich gestossen und den safft darauch getruckt un gelegte auff die geschwere hinder den oren benymbt ir wee und das geschwer.

Spitzigen wegrich safft getruncken vertreibt die spülwürmb.

Item wen es in dem bauch grimmet der sol den bauch mit warmem safft deß krautz reiben, oder mit dem kraut, es hillft.

Corn poppy , Klatschmohn Papaver rhoeas,
Papaveraceae

Magsamen •
Papauer latine. Grece animone, vel miconiu. Arabice caxxchar chachilli vel caschasy.

In de buch genant circa instans, beschreibent unß die meyster und sprechen, das do sey zweyerlej magsamen der ein weiß am samen, d ander schwartz am samen, der weiß ist von natur kalt und feucht, d schwartz ist kalt und trucken von natur. Disen samen soll man salmlen im summer, so er zeitiget und der weret, v.iare unuersert.

Aus disen beiden samel soll man machen ein pflaster, und darunder müsschen frawenmilich und das weiß von eiren, und das gelegte an den schlaff machet ruwen und wol schlaffen.

Die frawen aus dem lande Salernitanie genannte puluerisirent den weissen magsamen und müschen das puluer mit irer eignen milich, und geben das iren kindern, die schlaffent ser daruon un deüent auch wol. Den schwartzen magsamen sol man nit also eingeben wann er ist von natur töten, aber aufwendig deß leibs mag man yn wol nüzen.

Wer ein geschwer hett an seinem leyb der nem deß samen vo weissem magensamen. Oder das kraut darvon, und stosse das und müsch darund rosen öl un leg das auff das geschwer gleich eine pflaster das zeücht grosse hitz aus, un sonderlich auff die heyssen lebern gelegt, der ist es vast nütz.

Platearius. Nym puluer vo dem weissen magsamen un müsch das mit veielöl un schmir den ruckmeissel darmit, diß benymbt die sucht der gelider und sterckt die.

Dyascorides spricht, das do sey dreyerhande magsamen. Einer wechst mit weissen plumen, der ander mit rosenfarben, der drit mit pleichen, under den dreien ist der mit den weissen plumen der best, von de macht man den besten opiat. Den machen etlich also. So d magsam noch iung ist un nit garzeitig so schneidet man die oberst haut ab die milich die do herab fleüst un den saffte behelt ma, dasselb ist gut zu megerley ertzney. Etlich stossent die magsamheübter in irer selbst milich die von den heübtern geet, un den safft behellt ma, dasselb ist gut an der sunnen getrücknet un diente zu den ertzneien die do schlaffen machen. Der rosenrotplumen hat der ist darnach d beste, daruon do macht man öle das ist man in der kost.

Wer nit schlaffen mag d stoß magsamen welicherley er gehaben mage, und werm den und tring den safft daraus un zwahedan darmit das antlütz so gewinnet er ein guten schlaff.

Item so diß weissen magensamen heübter noch grün sind so sol man die sieden in wasser also das das dritteile honig darinnen sey, diß seüd als lang und als vil das es als dick werd als das honig. Diß sol man wol gehalten, wan es ist gar gut zu vi dingen.

Dasselb genützet gibt guten schlaff und vertreibet den husten und bestopffet den fliessenden bauch sich darmit bestrichen.

Isaac spricht. Wer het das gegicht in den süessen genannt podogra, der neme opiu von magsamen und thu dartzu rosenöl un bestreich dein füeß damit, es vertreibet das podogra zuhand.

Den kindern mag ma auch geben weissen magsamen gepuluert in milch vermengte machet sy schlaffende.

Weissen magsamen gepuluert un vermengt in veielöle und darmit bestrichen den ruckenmeissel, ist gut für das vieber un hitze der lebern.

Magsamenpletter in essig gesotten un auff sant anthonien feür gelegt ist es vertreiben.

Common flax , Gemeiner Lein Linum usitatissimum,
Linaceae

Flachs•
Linu Latine.

Die meyster sprechen gemaingklich das der sam geprauchet werd in der ertzney und nit das kraut, noch auch die wurtzel.

Meyster Galienus in dem vy.buch genannte Simplicium farmacairum in dem capitel linu das ist von leinsamen beschreibet unß un spricht. Das leinsamen sey heiß am ersten grad, un feücht un trucken am mittel deß andern grades.

Diser sam ist int gut zu essen, wann wer den samen esse der geschwülle über allen seinen leibe.

Serapiu in dem buch aggregatoris beschreibt unß un spricht, diser samen sey subtil machen und mach harmen, und pringt den frawen ir plumen, ein pflaster darvo gemacht und auff den bauch geleget.

Ite man mag disen samen wol prauchen zu einem cristier als sibengetzeite.

Meyster Paulus spricht, das leinsam geprennt auff kolen geb einen subtilen rauch den gelassen in die nasen benymbt den schnoppen also den rauch gelassen unden auff benymbt das wee der muter.

Diascorides spricht das leinsamen gesoten in wasser und den gelegt auff die untzeitigen geschwer vertzeret die und macht sy zeitig, und sunderlich die geschwere in den oren.

Meister Wilhelmus in seier cirorgj beschreibt unß und spricht, das die pleter von dem flachs garnütz sind un sunderlich in der cirorgy, dann wen man die pleter legt auff ein zeytig geschwere so macht es zuhant ein loch darein, allso das man es nit auff reyssen noch prennen bedarff.

Ite. Wem wee ist in der seiten der sied leinsamen in wasser un trucke ein leinens tuch in das wasser allso warm un leg es auff die seitten es vergeet zuhande.

Welicher gepreinnt wer von dem feür, der sied leinsamen in wasser vast wol un netz ein tuch darinne und leg das auff den prannt, es zeüchte yn aus senfftigklich.

Red clover , Wiesenklee Trifolium pratense,
Fabaceae

Klee •
Trifoliu latine Grece lotos vel zhrat vel lotus. Arabice handachua vel cua vel cuff.

Serapio in de capitel handachuca beschreibet unß, und spricht das do sey zweyerhant klee, einer zem der ander wild. Der wild hat einen stenge, zweier arm lang und hat vil zincken, un hat einen samen der gleichet fenu greco, das ist sibengetzeit samen, alleine das der an dem wilden klee kleiner ist. Die heymischen klee sind uns wol bekannt, un wachssent geren in den gertten und haben ein dünnen stengel mit pletern der sind, iij. an dem stil.

Dyascorides spricht das auch ein ander gewex sey das klee heist, un das wechst auff dem wasser. Diß kraut hat ein stengel gleich den ponen, un hat ein weissen samen. Diß kraut hat von natur das es sich ertzeigt so die sunn auffgeet un wider nider als tunckes sich under das wasser.

In Babylonia machen sy prot aus disem samen, das sterckt und temperit de menschen sein geplüt.

Trifoliu ist heiß an dem ersten grade.

Klee gesoten in wasser un das getruncken ist gut de der ein erkalten magen hett.

Diß wasser ist auch gut de dermgegicht.

Un ist gut wen ein tarant gepissen het oder ein ander gifftig tier das darauff gelegt, benymbt ym den schmertzen.

Ite der samen d wilden klee ist besser un stercker in d krafft dann das kraut.

Kleesamen gestossen un diß puluer gestreüt auf das verwunte oder zerschrunden gemechte, hilfft wol.

Platearius, diser sam gesoten in wein, den getruncken am anfange d wassersucht benymbt sy zuhand.

Der sam gesoten un den tampff vo unden auff gelassen hilfft d verstopfften matricen un reinigt sy.

Dyascorides spricht das deß heymischen kleesamen un seine pleter gesotten in wasser und dises getruncken hilfft die die ein geschwer habe an der prust.

Un ist gut wider den plutgang. Un für sant valentins sucht, un für die wassersucht.

Wer terciana het das ist d dritteglich ritten, der trinck von kleesamen un von de kraut mit wein gesoten, es hilfft.

Nightshade, Tollkirsche Atropa Belladonna,
Solanaceae

Dollwurtz•
Dua versa latine et grece•

Die meyster sprechen das diß sey ein kraut un hat knöpff die sind übergestrülpet.

Dises kraut un wurzel prauchet man in der erzney, un ist gut genützt für grosse hitz aufwendig un inwendig deß leibs, aber sy macht unmeret die melancoley, darumb söllen sich die selben hüten vor disem kraut un der wurtzel.

Dyascorides spricht, Wer grosse hitz habe der soll trincken von diser wurtzel mit gerstenwasser od mit endivienwasser sy kült gar vast wol.

Weliche fraw diß krautz oder der wurtzel nützet, die vellt gern in ein kranckeit mania genannt, das ist deß hirnß wüten, und darumb söllen alle menschen diß meiden die vö natur kalt un trucken sind, un sunderlich die frawen wan ir hirn kalt un feucht ist. Und dises kraut ein soliche complex meret und nit minderet.

Head to the chapel ::

• Hortus Conclusus •